المدونة

نتاج السنين شعر, أدب, سياسة
 
الرئيسيةمكتبة الصورس .و .جبحـثالأعضاءالمجموعاتالتسجيلدخول
بحـث
 
 

نتائج البحث
 
Rechercher بحث متقدم
المواضيع الأخيرة
» ديوان أخت ذاك القمر
الأربعاء ديسمبر 24, 2014 2:46 pm من طرف تيسير نصرالدين

» المفارد
الإثنين ديسمبر 22, 2014 11:24 pm من طرف تيسير نصرالدين

» ديوان عطور القوافي
الأحد ديسمبر 21, 2014 10:55 pm من طرف تيسير نصرالدين

» شقو الستارة
الأحد ديسمبر 21, 2014 1:12 pm من طرف تيسير نصرالدين

» إهداء
الثلاثاء أغسطس 19, 2014 2:07 pm من طرف تيسير نصرالدين

» زجل مع الشاعر فراس عبيد
الأحد مارس 11, 2012 7:23 pm من طرف تيسير نصرالدين

» لعنة الاشتياق
السبت سبتمبر 24, 2011 6:51 pm من طرف تيسير نصرالدين

» النخبة
السبت سبتمبر 24, 2011 6:46 pm من طرف تيسير نصرالدين

» وجهة سمع
السبت سبتمبر 24, 2011 6:45 pm من طرف تيسير نصرالدين

ازرار التصفُّح

مدونتي

التبادل الاعلاني
                                                                   
   
 
 
 
 
 

 

شاطر | 
 

 زجل مع الشاعر فراس عبيد

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
تيسير نصرالدين
Admin


عدد المساهمات : 242
تاريخ التسجيل : 26/12/2010

مُساهمةموضوع: زجل مع الشاعر فراس عبيد   الأحد مارس 11, 2012 6:51 pm

ابن البلد للشاعرية زيرها ------ والقافية من تحت امرو يديرها

لما بيوت الشعر تفصل عيرها------- الا شموخ وفلسفه ما بعيرها

عاصم عصامي الموهبي بيثيرها ---- وعبيد منقذ للمعاني يجيرها

وزيادها شاعر الو تقديرها------- كثر النضح بيشق خرزة بيرها

وايطاليا بتيسيرها او ميرها------- لازم يحطوا صورتو عا ليرها

ببعث على جناح المحبة سوسني------- توصل محبتنا لقلب تيسيرها

فراس

--------------------------------------

إبن البلد للشاعريي سيدها ...... وبنت القوافي بيمسكا من إيدها

بيكتب حروفو بنفَس تنهيدها ......... تيلبِّسا عقد البلاغة بجيدها

الكروم لمّا بتفرش عناقيدها ........ بتعقد نواة مخمّرة لنبيدها

والقلام لمّا بتطلق مواعيدها ....... بتعلن على روس المنابر عيدها

ونحنا لحتى نعيّد بيوم القلم ...... جبنا المعاني تطلق زغاريدها

تيسير
-------------------------------------
البلد كتب:
عيد القلم بحروف شعر منورا--------------برزخ معاني من كواكب عالثرا
شعر الزجل كيف صار مجد وعنترا------------وقدح وهجاء وذم مدح ومفخرا
شعر الزجل نسمة ورود معطرا-------------زهره اجت تتغار من مبسم مرا
شعر الزجل ابداع فوق المقدرا------------شعر الزجل لاهوت نفس محررا
شعر الزجل صفنة وخيال وجوهرا-----------بالروس محطوطة بخزنة مسكرا
بالمنتدا شوصار شويلي جرا---------------ساعة غزل ساعة سيوف ومجزرا
بالسلم شعري حقول ورد مزهرا------------وبالحرب برميكن سوا عالمقبرا
انكنتواقناطربالزجل جايي انا-----------هد القناطر قنطرا عاقنطرا
فراس
-------------------------------------------

-----------------------------
جايي بقبضة سيف ماضي للشغاف ....... تجرح قلوب اللابسة ثوب العفاف

خلي الإبل توردعلى حد الضفاف ....... ولا تعكر الينبوع بسنين الجفاف

شاعر إنت , بشهدإلكْ بالإحترف ....... لكن أنا بالمملكة سيد القاف

عندك النون الساكنةوعندي الكاف .... ومش رح يكون بغيرحرفي إعتراف

الكلمةعروس القافيةوما بتنصمد ..... إلاّ مالبسها أنا ثوب الزفاف

تيسير

-------------------------------------------
-----------------------------------------------

في لي الشرف للمعرفي ابقا سفير___حاكي المعري والفرزدق مع جرير
لامارتين وانشتاين من الضمير___صبح على دانتي ومسي شكسبير
اتركني سفير الورد بعيون الاثير___اتركني سفيرالنهر اسهر بالغدير
وبالنون كمل كافك بتبقا كبير___من دونها لافي إماره ولاأمير
بكون الخبر للقز حيكني حرير___بكون الخبر للنحل صممني قفير
وخبر شباب المنتدى ابن البلد___ مابيكبح جماحو كبير ولاصغير
فراس

-------------------------------------------------


إبن البلد شاعر وفي وعندو قيم .... واقف عمنبر شعرنا متل العلم

بين امتدادالقافيي وبين النغم .... من جوهر الردات عميبني هرم

وكون الشعر تاريخ وكنوز وحكم .... بخلد الأبطال وصحاب القلم

شو قولتك بمبارك المتل الصنم .... قاعد متل فرعون يتحدى ألامم

بدّا مطالب بالهتاف وبالحكي .... أو بدّها بحبل المشانق ينعدَمْ


تيسير




ابن البلد كتب:
اهلا بوهادي ليش داخل عم تضوج-----ومشيت عالطرقات والطرقات عوج

شوباك عم بتدق راسك بالبروج-------وعاموجة الكلمات مش قادر تموج

بلشت ياتيسير قدامي تروج----------وضيعت روسيّا على شواطي الزنوج

مازال بعدك عالثقافي مش لجوج-------سكرت باب المكتبة قفلت الدروج

يوم المعارك بعتلي اعلى سروج------ويوم الغزل عم هز وردات المروج

نقي عذوقك من مواضيع الزجل-------لكن دخول المعركي غير الخروج

فراس
--------------------------------------

يافارس العسروج خيلك معتلي ...... تروك الغزل وتروك سيف المرجلي

جبلي نسيج الحرف من ثوب الولي ... وجراح فوق الغيم صوت الجلجلي

بعثلي من خيوط العتم نورالجلي .... ولوّن الشمس بميل ليل المكحلي

بين العتم والنورخلّي المسألي ..... واختار وحدة واترك الثاني إلي

ناطر أنا ردّك لحدد موقفي ......... ولسمّعك آيات شعري المنزلي

تيسير


--مابين نور وعتم بلشنا الحوار ----------شهقة عبيت هوفن ونهدة عاموزار

اتركلي العتم من شان مايضيق الحوار----واسبح بنورك موهبي وعز ووقار

ببقى بطية عتمة جفونك مسار-----------بتشوف مني ابعد بتاني مدار

ببقى بصدرك قلب من غمزه بغار--------بيضخ دموا عاليمين وعاليسار

ببقى بعتمة ارض عتم عالبدار---------بفرش سرير الارض شرشف من خضار

ولولا التواضع من جلالة عتمتي---------ما كان طل عليك نور ولا نهار


فراس



.رح اتركك بالعتم وحدك يارفيق ........... تتخبط بعكازتك متل الغريق

البذار الّي من قبر عتمو بفيق ...........صمّخ بوهج النور ليشق الطريق

ولولا الفضا والضو ماشفتو طليق ..... يطرح سبل للشمس من عشقوالعتيق

لا تقول إن من العمي عامل فريق ........ وبياخذوا الأهداف من فج وغميق

وبالنيشني صياد فاقد للنظر .......... صاد الحمامة الطايره بالمنجنيق


تيسير
---------------------------------
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://taisir.yoo7.com
تيسير نصرالدين
Admin


عدد المساهمات : 242
تاريخ التسجيل : 26/12/2010

مُساهمةموضوع: رد: زجل مع الشاعر فراس عبيد   الأحد مارس 11, 2012 6:59 pm

تيسير نصر الدين وصلّي صور-----------احسن مانورك تحت عتمي يندثر

بعرف انت صياد من قبل السفر----------في بيت نار الجفت موجود الخطر

لولا انشعر والضو جواتو ظهر----------بيفجر بيقتل صاحبو بالمختصر

بعمل فريق من العمي يامعتبر-----------تنصير جوقة واحدة بالمؤتمر

اعمى المعره كان ابعد بالنظر-----------وبعدك ياطه حسين سيد عالبشر

رح ضلّني عتم عنجمك والقمر---------وعتم غيوم الداكنة وانزل مطر

وابقى ثقب اسود بساحات الزجل------اشفطكن واضغطكن وامحي الاثر

فراس

---------------------------

لحتى السندياني يطول عمرا.......تعمشقت عالضو وتغاوت بكبرا

إنت ليل القصيدة الضاق صبرا ..... وأناضحكة مداها ونور فجرا

أنت عتم الكفاف بمية حصرا ...... رهنت بمحبسك ابن المعرّى

إنت جرح القصيدة وغل صدرا ... وأناعرض القوافي وطول عمرا

لوأنك خيرت بكنوز كسرى ...... لتاخذ من ضياء العين عُشرا

لقلتلك مافي بالكون نعمة ....... توازي نور عين وغظ نظرا


تيسير

--------------------------------

شو صار بالوافر نقلت على القصيد---------فتشت بنكك مش عم بلاقي رصيد

ضلك عالمعنّى تمني تستفيد-------------------رح غوص حتى انقذك مديت ايد

اشتد المرض نورو عبيك بوسعيد------------غمض عيونو عالعتم رحمة اكيد

موسى بتابوت العتم ضلو وحيد------------ويوسف بعتم البير من ماضي بعيد

ويونس بعتمة حوت مابيبقى شريد-----------وعيسى خلق بمغارة القدس العتيد

صان الاماني العتم تا رد البريد-----------ولما صَلب ياسوع مسمار الحديد

بعد الصلب بمغارة العتمة ارتاح----------تايرجع على النور يظهر من جديد

فراس

--------------------------------

إبن البلد, منّك أكيد منستفيد ..... حامل معك عسجَد من العقد الفريد

وبحيثك عملت النبي ساعي بريد ..... وحملت كل الأنبياء بفرد إيد

لا بد من تنوير طبعك هالعنيد ...... كونك عن عيون الحقيقة عبتحيد

عيسى إبن مريّم نذر نفسو شهيد ..... تيبدد الظلمات من نفس العبيد

وموسى الذكرتو بعتم لحدك وطيد..... حمل الوصايا من قبس ربوالمجيد

واجت الكواكب ساجدتلومن بعيد ..... ليوسف المن إخوتو طالو الوعيد

أاللّهْ نور , وكل نور من الإله ...... والعتم ظلمة والظلم منّو أكيد

تيسير

------------------------------------------


الله نور وضي عامستقبلك----------------دربو بعتم الجمجمه الناسك سلك

عتم الحناجر صوت مني موّلك--------------وعتم المحابر نور حرفك حمّلك

لعتم النفط يانور شو اللي نزّلك-------تعمل معارك والشعب صابو الهلك

ببقى عتم بدماغ ضوي عالفلك-----------فيي انطوا العالم الاكبر بالحلك

ومن وحي هالموضوع بدي اسالك-----------ما زال جسمك روح جواتو امتلك

اتركني بعتمة حابس الروح بجسد----------لاتشيلني عالنور مابرجع إلك.

فراس

----------------------------------

عتم الحناجر والمحابر مش تمام ..... والروح نبض النور بنفوس الأنام

حتّى نُصل إنت وأنا لمسك الختام ..... ومانضَلْ نترمجحْ على حبال الكلام

حدد مصير (العوّتَمي)عملها نظام ..... وعمم على الأجيال تقرا بالظلام

اطفي جهازك وابحر بنتْ المنام ..... وامنع أشعة إكس عن طب العظام

خلّي غراب البين يرمز للسلام ..... وقطاع نورالشمس واغتال الحمام

وطبّق جفونك عالمقل تحبس النور ...... لتعيش مع نفسك بحالة إنسجام


تيسير

---------------------------------------------

حتى الليلة نغير جو-------------ونغير اوزان الرتم

كل الدنيا نصا ضو-------------والنص الباقي بالعتم

ومن شان نشكل ياشباب شورايكم نميل عالغزل

----- كل ما افتحتي البلوتس==========ببعت مرسال

----- انتي يا زهر اللوتس ===========تحت الشلال

شفتك زهرة عطرية ----------من حولك سر

بحبك لكن ما فيي -----------عا بيتك مر

وعطرك عالشال خطيّة---------فكيلو الزر

[b]عم يزحف بالحنية----------- من تحت الشال

فراس

----------------------------

كانَت برداني ودفْيِتْ ----- ضَمْ وتطويقْ

تِكْيتْ عإيدي وغفْيتْ ---- ما بدّي تفيقْ

خايفْ الحْجالْ انجفْلتْ --- كَنزتها تضيقْ

وتتمقطع فيي انعرفتْ --- إني محتال

تيسير

------------------------------

جسمك يا قلعة شيزر --------خصرك في نار

مدفع رشاش شميزر ----------صدرك رادار

عيونك بتوزع ليزر --------داير من دار

اقوى من طلقة ميزر--------والسينوبال

فراس

-------------------------

كنعاني وبعدو قلبي ... بِ أوغاريب

مني تعلم المحبي ..... روميووجلييت

ياما أسرار مخبّي ...... مع فروديت

والقيصرأمري يلبي ....مع هانيبال


تيسير

--------------------------------

اسمك جلنار وفيكي---------عم جل النار

بدي النسمه تحاكيكي-------باحلى مشوار

واتضمك واتخبيكي----------باول ايار

وزهر الرمان عليكي-------يعمل مو

فراس

--------------------

مطرح ما الحسن مخبي .. توت وتفّاح

بدي بإيديي عبي ..... سلّة الرياح

خايف قصفات القبي .... لمّا تنزاح

تعرف هالناس بقلبي ....في شغلة بال


تيسير

--------------------------

ومبارح طار مبارك--------ياست الكل

بقلّك يامصر مبارك--------خليه يفل

وياكرنك عبي حجارك--------ياسمين وفل

اتحقق حلمك بصغارك--------واكسرت الغال

فراس

----------------------------------

مصر الكانت بالساحة ... تهتف وتعيد

ضد الطغمة السفاحة .... وضد التجديد

زاحت رمز الوقاحة .....بعزم وتسديد

وقدر الشعب الإطاحة .... بأكبر دجال


تيسير

-----------------------------


الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://taisir.yoo7.com
تيسير نصرالدين
Admin


عدد المساهمات : 242
تاريخ التسجيل : 26/12/2010

مُساهمةموضوع: رد: زجل مع الشاعر فراس عبيد   الأحد مارس 11, 2012 7:07 pm

قالت ؛ بحبك بس ما فيّي--------اسلامك بيرفض مسيحية

ودمعة عكرسة خدها بتموت-------بتنزل عليها حزن وعليّي

قلتلها وقلبي و قف مكبوت-------يمزّق حنايا الروح بالفيّي

من قبل مادينك رسم تالوت------آب وابن و الروح بشويّة

ومن قبل ديني وبدعةالملكوت------وحصان يعرج عالسما هديّة

ومن قبل ماالباباعمل كهنوت----ومن قبل عيسى واليهوديّة

لاكان في فاصل قسم البيوت-------ولا في شرايع تحكم سويّة

والآلهه ادونيس عشتاروت---------ذابو ببعضن حب حنيّة

وعصفورترغل حدكبش التوت-------ما اتحرنق على بركة الميّة

يالله تنكسر قيد كلّوسكوت--------ونلغي زمان من العبودية

ونلغي رسم بالذاكرةمنحوت------ونوقف عباب العلمني سويّة

وعاباب انسانيتك منفوت--------لا فرق عنا بين دين ودين
======ونصّك محبي يكتمل فيّي======

فراس

------------------------

قلتلّها دينك على ديني ..... ما إلكْ حجّي تا ترفضيني

حجّةميثاقي بهرم بوالهول .... صدقتها من قبل تكويني

مش جاي اتخمّج من سطنبول .... لاني ياباني ولاأناصيني

متلك أنايابنت إبن اصول .... وبفضّل الضيعة عالمديني

قالت دخيلك لأْ,مش معقول ..... ما بقبلك رجّال خمسيني

شوجاب الشوار بشهرأيلول .... لزهور غوياني بنياسيني

قلتلهالو تعرفي المجهول .... يارزقتي كنتي بتعذريني

وحياةربطة شعرك المجدول .... مافي زرع لوما تشاريني

بعدو القلب بخفقتومشغول .... والدم عميغلي بشراييني

وحيات يالّي كملك هالطول .... وكوّن جمالك تاتقهريني

ماعادفيكي تقتلي المقتول ....ولا عادفيكي تحرمي المشتاق
من غير مابغمرك تغمرني

تيسير

------------------------------

شعر الزجل مكتوب جدي مش هزل--------وعامغزل جفونك حريرو بينغزل

الله وجمالو بغمزة عيونا اختزل--------شعر الغزل نهدات من فجر الأزل

أنتي مليكة قلب عرشك ماانعزل--------وجودك بصدري ضلع كان وما يزل

وكل ما غمزتي بعينك الحلوةاٍلي--------بتألق وبكتب اٍلك ردة غزل

فراس


---كل ما انثنى فستان وبقدّو انحسر .... بتحني خوابي عيونّا تعبي النظر

ومابين قطبة وزاف وخيوط الكمر ..... بتصير تشبك حالها متل الأًبر

بتمسك طراف الخيط وتكرّو بحذر ...... وتفرفطو من غير ما تخلّي أثر

ولمّا عصبوة بالنا يزيدالحلى ...... يمكن بصير الواجب نغض البصر




تيسير
----------------------------------------
الشعّار قبالي حامو----وسيفي اتحرقص بحزامو

=مابيترك راس على كتاف----غير ما يزتو قدامو


الشعّار بوحي التسبيح-----قبالي صف بيصطفوا

ديك الجن و ما بيصيح-----وزياد مكسر دفو

وعاصم قلعه ما بتزيح-----الأول تيسير بصفو

وشعري اعصارمن الريح-----بينشرحولن ألغامو

فراس

------------------------------

الشعّار قبالي حامو......وسيفي اتحرقص بحزامو

مابيترك راس على كتاف.....غير ما يزتو قدامو



ياشاعر يمكن رح غار ..... من أفكارك بالردة

لكن السيف البتّار ..... بحزامو صار مصدي

رح صليلك ليل نهار ..... تتضلك قاعد حدي

طالما كل الشعّار ..... عحفاف المنبر نامو

تيسير

------------------------------

اللي نامو عندك ياحيف-------مابيلقوا حدي ردي

لكن لولا بتدخل ضيف-------بقدملك قلبي بيدي

وعم تحكي بليالي الكيف-------عن سيفي اٍنو مصدي

معناتا ما عرفت السيف-------ولا بتعرف استخدامو

فراس

------------------------------------




ليل وسيف وبيدا وخيل..... عرفوا مجدي وإقدامي

والزهرة مع نجم سهيل ..... عملتن بكلة لحزامي

ديمونة وزوجا عطيل ...... وليم خطن بقلامي

ولما بيحلم جفن الليل..... منّي بياخذ أحلامو


تيسير
_________________


سيفي اتكنّى بذوالفقار-------حملو حيدر بالكوفة

والباشا ع الاٍستعمار--------حملو ومنصور الشوفي

ومااحملت السيف البتار------اٍلاّ تااٍقري ضيوفي

بصون العهد بغيث الجار------وشرعي بطبق أحكامو

فراس

----------------

شفنا بيمينك يابيك ... سيف مرصّع للزيني

عمبتقطّع قالب كيك .... وبدل الواحد دزيني

وحتّى ما إتجنّى عليك... وإشهر سيفي وتوزيني

وقّع سيفك من إيديك ...ونفذ حكمي بإعدامو


ميسير

-------------------------------------

يا جايي ببرغي ومفك------انشالله عزمك متل الزير

فك اللبوة بكفي انفك-----وخالع باط السبع كثير

وتا توقع سيفي وتنفك-----اسأل قبلك يا تيسير

عن عنتر سيفي ماانفك-----تا أعلن استسلامو


فراس

-----------------------

الشعّار قبالي نامو...... مابين مغفّي ونعسان

كل واحد لم زلامو ....... وضليت لوحدي سهران


مفك وبرغي مع مع مفتاح.. وشوّاح وعزقة وترك

ترك وعزقة مع شوّاح .... ومفتاح وبرغيي ومفك

عك وفانين وردّاح ..... وسلاح مجهّز للدك

للدك مجهّز السلاح ..... وعك وفانين وردّاح

ورداحين وعك وفان


تيسير

-----------------------------------

بغير حال بغمزة عين --------على الميلين بغفي رجال


رجال بغفي على الميلين ------بغمزة عين بغير حال


بركان وسهل وتلين--------- مع بو زين بيبقوا خِيال


خِيال بيبقوا مع بو زين---------بسهل وبركانين وتل


----------وتلين وسهل وبركان

فراس

----------------------------------
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://taisir.yoo7.com
تيسير نصرالدين
Admin


عدد المساهمات : 242
تاريخ التسجيل : 26/12/2010

مُساهمةموضوع: رد: زجل مع الشاعر فراس عبيد   الأحد مارس 11, 2012 7:13 pm

تنهيد وأشواق وشب .....عالدرب تهدّي مواعيد

مواعيد تهدّي عالدرب..... شب وأشواق وتنهيد

بقلب وعشقانين وحب ... تصب الوجداللهفة تزيد

تزيداللهفةالوجد تصب....بقلب وعشقانين وحب

وحب وقلبين وعشقان


تيسير

-------------------------------------

عليكي دخت بنص تموز------ لحتى نجوز البحر بيخت

البحر بيخت لحتى نجوز ------بنص تموز عليكي دخت

رمان وطيرين وكوز------عشقت الروز بأحلى تخت

بأحلى تخت عشقت الروز------بكوز ورمانين وطير

----------وطيرين وكوز ورمان

فراس

-------------------------------

يحن القلب وبعدوالشوق.....بتوق وجاعو عمبتعن

عمبتعن وجاعو بتوق .....وبعدو القلب بشوق يحن

دنين وميزان وطوق ...... قدار تسوق ودرب تجن

درب تجن قدار تسوق ..... وميزانين ووطوق ودن

وطوقين ودن وميزان

تيسير

--------------------------

البلد في الأحد 27 فبراير 2011 - 3:03
-----حتى تقوم تعبي كروم بأرض الروم المنفيّة

-----بالمجزوم بحك غيوم بطفي نجوم الشعريّة

جايي عِد حصون وهِد بأمس وغَد العالم طوف

الردة برِد وحكيي جَد وبوضع حَد الكلمة سيوف

شعري صَد وبحري مَد وجزري قَد جبال الشوف

انجد الجَد بشد اليَد بسد السَد باٍيديي

فراس

----------------------

جايي تجر ,الطير الحر , لكر وفر بهالمجزوم

عندي سر ,بحرف الجر ,ومش مضطر ببحري تعوم

بسهل وبر , هزمت الشر ,عصرت المر سقيتوزوم

وحرفي دَرْ كنوز الدُرْ لحتّى يمُرْ بحنيي


تيسير

----------------------------------

الكل اصطفْ بأول صفْ الضابط لفْ بهالباحه

جفتي هفْ الخردق حفْ وصدت الرفْ بها الساحه

وزنك خفْ وقلبك غفْ ودمعك جفْ بها الواحه

قلبي انكفْ ونعشي اندفْ بتقشع دفْ بعينيّي

فراس

----------------------------

بحد سيوف , وشَدْ حروف , برص صفوف بكلمة قف

بدق دفوف و وحنّي كفوف ,وعالمكشوف بمحّي الصف

بخرطش جوف , كلاشنكوف ,بشوف الخوف بقلبك رفْ

وحتّى تشوف, الدنيا وقوف ,بقلبي بحوف عروبيي




تيسير

---------------------------------------

بغني حجاز بأرض حجاز مش عالجاز تزقفلي

بازي فاز وبحرك جاز ومش معتاز توقفلي

عالتلفاز ان شفت الباز عالهزاز بترجفلي

بشّعل كاز من الممتاز بالقوقازعلى الدفلي

لوح قزاز من الجيب واز حارب غاز الروسيّة



فراس

-------------------------

عد الرد ,بجد وكد ....وصول وجول, فعول وقول

صد وسد, لرد الند ....فلول تحول , وحول سيول

شد القد, بحدالود ....حلول تنول , عقول اصول

بمدالغد,بجهداليد.... بطول طبول الحريي


تيسير

----------------------------

سيفي جز الصيف ونز-----وهر الدم وفر الغم

ضيفي اعتز بريفي انغز----بزر الشم الدهر انحم

كيفي مز وطيفي ابتز----البر انسم الشر التم

شيفي هز الجيفي وحز-----يطم اليم بلا ميّه

فراس

------------------------------
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://taisir.yoo7.com
تيسير نصرالدين
Admin


عدد المساهمات : 242
تاريخ التسجيل : 26/12/2010

مُساهمةموضوع: رد: زجل مع الشاعر فراس عبيد   الأحد مارس 11, 2012 7:18 pm

من بعد ما الأوزان فاض جميلها-----حبيت أرسم فوق كحلة ميلها

شرّف ياتيسير القوافي كيلها-------واستعرض حمولة جملها وفيلها

كلمة زجلنا مابتقطع ميلها------اتأنى استعين بمعجم لتحليلها

وتالقنبلي يقصر نسيج فتيلها-----جاييك شيخ المعرفة يفتيلها

بالمنتدى بدي الحواجز زيلها----واسرق من الصفحة صبر تحميلها

ومتل البرق ادخل عصفحات الزجل-----صفحة تأطويها وصفحة شيلها

فراس

----------------------------------

إبن البلد يارفيق درب المعرفي ... برفقتك عمرين مش رح إكتفي

شاعر إنتْ والشوق عاحرفك غفي ... تايلبّسْ الكلمة تياب العاطفي

غمرت القوافي بغمرك البعدووفي... وبرد المسافي بدفا قلبك دفي

وسكبت نخبك ورفعت كاس الوفا .... تانشربوا فوق السطور مناصفي


تيسير

---------------------------------------

--خيي بوأيمن اٍنت ياشاعر أديب----أكثر من الأبهر عصمّامي قريب

بثقب نجومك ياسما وبجدل لهيب-----نيزك وقع تااٍصنع العقد المهيب

وبستأذنك حتى بتواضع تستجيب----من قبل ما حطّو عصدرك ياحبيب

وهلّق عموضوعين ما بدي نحيب-----نقي عذوقك والفضا عندي رحيب

بين ال لعايش بالوطن جايع كئيب---وبين ال لرايح يغترب يعمل طبيب

من الاٍغتراب المال يمكن رح يجيب----واللي بأرضو عاش مابيبقى سليب

أحيان بالغربة الحنين بينطفي---وأحيان عاأرضو الفتى بيبقى غريب

فراس
-------------------------------------



إبن البلد ياصاحب العقد الثمين .... وحروف من بحر القوافي الطايعين

اكتبني قصيدة من دموع الغايبين .... وغصّة عمر متحجرّة بعين السنين

الغربة برد مسكون بالريح الخزين .... وزهمةأنين مرافقة صوت الحنين

مهما الوطن يتحامل بيبقى أمين .... بيبقى علامة فارقة فوق الجبين

ومتل ماقال سيدنا اميرالمؤمنين .... كل ما أجت نعمة بتخسر نعمتين

حتى الوطن لو جار بضلّو وطن ....... بين البطين الأيسر وبين اليمين


تيسير

------------------------------------

لما الوطن بيكون عاشعبو كريم---لا فرق عندو بين فقير وبين زعيم

مابتركو ولا بهجرو الله العليم---والروح ترخص لو حدا مس النسيم

لكن اٍذا بيكون حيتان وجحيم---والتاجر بينهب فقيرو واليتيم

والواسطات بتحرف الخط السليم---وقانون عم يخدم مصالح بالصميم

بفكر بفرصة ثانية احيي الرميم---واٍتغرب وبالغرب اتسما مقيم

وكمل دراسة ان أمكن وأعمل حكيم---يمّا بذرة عالم قيامة بقيم

وبرجع لآدم غوص بالعصر القديم---بشوفو ما قدّر نعمة الرب الرحيم

لولا مايترك آدم الجنة وهجر--- كنا لحد اليوم من عيش بنعيم

فراس

-------------------------

لا تفيق الأوجاع وعيون الشجن .... وتفتح ندوب الي ختم جرحا الزمن

ولاتخلط ذنوب المواطن بالوطن.... شو منعمل انكان الوصي لا يؤتمن

الإنسان ياابن البلداصل المحن... لو قل خير الناس وازداد الوهن

في ناس لوسكنتها بجنة عدن ..... بتزحف لصوب النار لتسم البدن

كم مغترب قبل السفرأرضورهن .... ليعود ظافر بالغنايم و الثمن

ورجع بآواخر سفرتو عميرتجي ..... حامل معو شواقو وحنينو والكفن



تيسير

-----------------------------------------

خيي بو أيمن كاس دوم بينشرب---مهما بعد عن هالوطن منو اقترب

سبع المعارك ما عرف يوم الهرب---بحزن اٍذا عن هالبلد شفتو اغترب

في ناس بتهاجر تتوصل للأرب---تشقى كرامة ينجلي عنها الكرب

وفي ناس كوكبها بسفرهاماغرب---والبيت فاشل بالوطن شفتو انخرب

وفي ناس بالغربة الدولر منهن زرب---شوالفايدي مازال عن خطّو ورب

كم ألف شب اتهجروا وراحوا ونسوا---أصلن وفصلن والعروبة والعرب

فراس

---------------------------------------

نخب الوطن كاس المحبة منشربو .... ومنحب قحطانو ودمشقو وعربو

مش كل يالّي سافروا وتغربوا .... عن قصد كانواللغنى عميطلبوا

فيهن فنى عمرو لإسمو يكتبو ....... عامنبر المجد,انتهى عامصلبو

وفيهن غني,عزةوشهامة مكسبو ...... مازاح عن درب القيم لواتعبو

والي بيعرفوابالمراحل يلعبوا........ لو وين ما حطيتهن رح ينهبوا

وفي ناس بتشوف الوطن بقرةحلوب.... حتى انفطمتن رح يضلن يحلبوا

تيسير

-------------------------------------

عمرا الغربة المغترب ما عابتو---لو شرّعوا بأقصى الأرض بوابتو

بسّ السبع لولا هجر من غابتو---بيضل دمعو يجرحو بكتابتو

وجد وحنين بقلب قلبو كابتو---مهما قسي والناس كلّها هابتو

اتركني طفل بالوطن لاحق طابتو---شرشو بنص الأرض بيّو ثابتو

اتركني متل راعي سرى عادابتو---يترنّموا الزهرات عاشبّابتو

وفلاح عاشق ريحة طراب الوطن ---يتمسك بروح الطبيعة ال جابتو



فراس

----------------------------------------
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://taisir.yoo7.com
تيسير نصرالدين
Admin


عدد المساهمات : 242
تاريخ التسجيل : 26/12/2010

مُساهمةموضوع: عتابا    الأحد مارس 11, 2012 7:23 pm


اٍنتو نجوم بالزرقا بُعدها===خربط كل من عدها بِعدها

نحنا بقلب الجنينة ال بعدها===بتفرض عالشعر فكر وأدب

فراس

------------------

عتابا عسطر حبك بدينا ..... بداية مريم العذرى بدينا

ولحتى نعود مش طالع بدينا .... قدرنا بالجفا يطول الغياب


تيسير

-----------------------

كنتواالبداية بكون الكن خاتِمي---كنتواالشيعه بكون الكن خاتَمي

الدنيا قبالي متل برمة خاتِمي---أصغر من طموحي وصمودي بالحراب
فراس

----------------------


قلت أنساك ونساني ولكن ..... لا جف الدمع بعيوني ولا كنْ

ياريت الحب لاجاني ولاكان .... ولا تمرمرت عادروب الحباب

تيسير

------------------------

مرق عالمنتدى شُعرا عشعرا---ورخى جفن المسا الأشقر عشَعرا

كنت احضنتها بصدري عشعرا---دقت اٍمها علينا الباب

فراس

---------------------

لهيب الشوق عميغلي وحَرْ ,في .... كوى من حرقتو قلامي وحرفي

ياريت الكون من ملكي وحُر,في ....لبدّل خدها بشمس الغياب




تيسير

--------------------------------

تعا يا حب من بحر المتى هات=== وقلّي خوذ حاجتنا لمتى هات

أنا لعيونِك اقطعت المتاهات===لحتى التقي بأغلى حباب

فراس

------------------------

حبيبي تاع لقلبي وحل في .... لحتّى تكون إيماني وحلفي

أنا تحالفت بعيونك وحلفي .... سواد الكحل بخطوط الهداب

تيسير

---------------------
وابديت سبّح ب اٍسم من في علا==وسحّب حروف الجر ب من في على

لاتسألو عالقلب يل منفي على==دار الأهل ومحل ما سكْنو الحباب

فراس

----------------------------

لونّو الكون يقلب ألف قلبي ..... سوريا دوم رح تبقى بقلبي

حنين الشوق لو نبضويقل بي ..... بكون الدهر حولني تراب

تيسير

-------------------------------

الزجل عنّا تراث كثير شعبي===بيرضي بالفكر أزواق شعبي

فتحنا للشعر مليون شُعبي ===لحتى ندرّس حروف الآداب



فراس
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://taisir.yoo7.com
 
زجل مع الشاعر فراس عبيد
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
المدونة  :: الزجل-
انتقل الى: