شقو الستارة

موضوع: شقو الستارة الأحد ديسمبر 21, 2014 12:34 pm

حْذِيرٌ :
لِهَذِهِ المادَةِ قَانُونُ حِفْظ يمنَعُ كُلَّ تَجَاوُزٍ بالنَّشْرِ دُونَ النَّسَبِ للشعراء الدكتور زياد قبلان و تيسير نصر الدين

شقوا الستارة ، ووسعوا بواب المدى
جايي عامهر مكهرب بسوط الحدا

شاعر انا طاعت الي كفوف الردى
وشعري ترك عاصفحة عطاردصدى

بكفي عجنت الشعر اول ما ابتدا
رب الخليقة يعجن بأدم هدى

ورجعت عامهلي وامشي عالهدا
عمّر منابر شعر بشفار المُدا

وهلق عامنبر شعر لسويدا بدا
حرب القوافي العاشقة معنى الفدا

جايي انا وسيفي ودواتي والقلم
وغضبة غضنفر شعر مايرحم حدا

زياد

Admin عدد المساهمات : 242 تاريخ التسجيل : 26/12/2010

ياشاعر الجايي مكهرب مهرتو
وجاي بأول حرف يعطي وهرتو

جايي تَ يرهبنا بصوتو ونبرتو
ويحر ق متل نيرون أهلو وأخوتو

شاعر انت لكن كبيري عبرتو
هاجم تيقلع ألف عين بفكرتو

الشاعر متل عيسى المسيح بدعوتو
غير المحبة ما بتعرف جملتو

تفضّل الك تيسير مادد سفرتو
وناطر تتكمل بالحبايب سهرتو

الي بيبدي الخير بزيد الفرح
والّي بيتمادى بنغّص فرحتو

تيسير

Admin عدد المساهمات : 242 تاريخ التسجيل : 26/12/2010

تيسير ياشاعر خلق قبل الحنين
انت وابو الدرداء من ذات العجين

لكن على منبر إله الملهمين
بقلك كلام وبعد اذن السامعين

سلطان باشا والنشاما الثايرين
نشفرة مهند سطروا المجد المبين

مش بالمودة ومرحبا وخبز وحنين
بتقدر تحرر ارض وبتحمي العرين

وان كنت معجب بيسوع الأولين
وبسياستو وبمدأ الرقة ولين

خد اليسار تورم سمحلي بقى
بلش معك الكفوف عالخد اليمين

زياد

Admin عدد المساهمات : 242 تاريخ التسجيل : 26/12/2010

انقلنا بإنّو لكلْ مقالي مَقامْ
ما بتنْطبقْ فَتوةْ حلالكْ عَالحَرامْ

في فرق بين المرجلة والإنتقام
مثل الفرق بين الجبنْ والإحترام

خدّي إذا تورّم عأيدك مش مُلام
والعفّة عند المقدرة طبع الكرام

عامل متل صيّاد بجناح الظلام
جايي عراس المآذنة يقوس حمام

ضيوا على عيسى النبي الفين عام
حامل صليبو وسار عادرب الآلام

آخر كلامو كان عَ قوس الصليب
بعد المجد للرب عالأرض السلام

تيسير

Admin عدد المساهمات : 242 تاريخ التسجيل : 26/12/2010

تركلي مسيح الكون عاخشاب الصليب
وقرّب لعندي واسمع الراي المصيب

سلطان لما حرر العشق السليب
بالمرجلة مش حقد ياشاعر لبيب

ومتلو انا جايي على جناح اللهيب
حرر منابر صار منظرها كئيب

بالسيف جايي ، لاعصاية ، ولا قضيب
وجايب قلم رويان من فكري الرهيب

بالسيف بحمي ساحتي بيوم الوغى
وبكتب بإيدي وصية البدو طبيب

زياد

Admin عدد المساهمات : 242 تاريخ التسجيل : 26/12/2010

دكتور حاجي تُحرّني دمّي غلي
ولا ترتكي عاسيف صولاتو إلي

في سيف للعدل ومعو مابينطلي
باطل , تيحرفنا عن الحق الجلي

سلطان باشا قاد ثورة مزلزلي
طلاّب حق وكان فيها الأولي

مش كل حامل سيف نبراسو علي
ولا كل من سبّح بمسبحتو ولي

حاجك بطولي وعنتريي ومرجلي
عامنبر البحصد قصيدو بمنجلي

وبّذكرك بسيف بن ملجم غدر
بالعابد الزهدان المفدّى علي

تيسير

Admin عدد المساهمات : 242 تاريخ التسجيل : 26/12/2010

تحصد قصيد بمنجلك يامرتكي
بزرع وحصيدة مابتكسب معركة

وحتى ياشاعرنا نفصّل بالحكي
الشغلة بسيطة لا تظن مشربكة

من يوم ما رب السما فضلو تكي
عاكتاف خلقو تايشييد مملكة

في ناس صاروا للأذية المهلكة
وفي ناس خلقوا يزرعوا للمشتكي

بزرع انا بذور الزهور الليلكي
ونخوة نشاما ل الليالي المظنكة

بزرع فرح بقلوب لوعها البكي
وبتحصدوها بالليالي المحلكة

بزرع تقاوة بالنفوس المشركة
بتحصد نتائجها بجنة مباركة

لولا الزرع ياصاحبي مافي حصيد
ولولا انا .. ماكان جعفر برمكي

زياد

Admin عدد المساهمات : 242 تاريخ التسجيل : 26/12/2010

زراع القوافي عسطوري مش حرام
بلكي بتتخلص عأيدي من الأثام

خلي المحبة تكبر وينمى الوئام
وزراع خير بتحصدو بيوم الرؤام

لكن , ياشاعر اجى وزاح اللثام
رافع سلاحو بوجهنا وناوي الخصام

شايف ملامح بان فيها الإنفصام
والمرجلة صارت عذوبة وانسجام

جايي بسيفك كنت تعمل مجزرة
واليوم جاي داعية ومحضر سلام

تيسير

Admin عدد المساهمات : 242 تاريخ التسجيل : 26/12/2010

بعدو الشعر عافرد حنّة يازميل
يزرع رعب بيشق صدر المستحيل

وبعدا الأصايل راكعة قبال الأصيل
تتوسل الرحمات من سيفو الصقيل

وبعدو حسام الشعر فاتح ارخبيل
يصف القوافي عامسافة الف ميل

شاعر انا عامنبري مافي بديل
ان طبق جفوني الموت او دنّى الرحيل

قبلي وبعدي ولو بيخلق الف جيل
يقولوا شعر وتفكروا العالم جميل

بيبقوا زغاب وبالشعر بدهن دليل
من معجم افكاري الدافق سلسبيل

الله خلقني بالشعر داوي العليل
وسيفي دوا الشعار ماعندي بديل

الساحة الي والعرش رهن بخنصري
خصوصي بعد مامات بومحمد خليل

زياد

Admin عدد المساهمات : 242 تاريخ التسجيل : 26/12/2010

خلّي الشعرعافَردْ حنّة ياحنون ْ
وركاب موج المعرفة وظهر المزون

ماراح يخفق قلب ضمّة, ولا سكونْ
إلاّ لشاعر مسْ كلماتو الجنون

وانعدْيِتْ فكارو بحكمة أفلاطون
وجملة شكسبير الأكون ولا أكون

شاعر أنا لا مملكة ولا يحزنون
عايش مابين القلب ورموش العيون

بتكي عزند القافية وبغفى بسكون
وبفيق عا همسة شعر صوتا حنون

ببني قلاعي وبالشعر بعمل حصون
وبحوطا بأسرار توت العنخمون

وبنام مرتاح الضمير وبتركا
يتخانقوا عليها اساتذة الفنون

تيسير

Admin عدد المساهمات : 242 تاريخ التسجيل : 26/12/2010

تركني جفن غافي على حدود السما
عملاق بيحاكي الجواري بالوَما

تركني إله بعرش عالعالم سما
وسلطان دهري وبالوغى حامي الحمى

تركني بمعبد شعر طوفانو طمى
حتى سقط يوداس وبحضني ارتمى

تركني انا وعشتار وعيون اللمى
نرعى الخليقة كل مابرعم نمى

وخليك عايش بين كنة وبين حما
وافتح (خجا) دروس التواضع علما

وخلي نزار يشاركك بالمدرسة
وكل ما ضوت ليلة بحياتك يعتما

زياد

Admin عدد المساهمات : 242 تاريخ التسجيل : 26/12/2010

راح اتركك سلطان لغرورك أسير
إنتَ وحور العين مع بئس المصير

وتشوف حالك معجزة ومالك نظير
وتغفى بأحلامك على صوت الشخير

راح تتركك عشتار مديون وفقير
من بعد ما تقطع من البيت الخمير

لا تعتدي عالشاعر الإسمو كبير
ومعروف اسمو للكبير وللزغير

نزار كان بكتبنا صوت الضمير
مطرح ما حرفو يحلّ بفجّر غدير

الطاقة الفتحتا عالصواعق سدها
أحسن مابدل الريح تحصد زمهرير
.
تيسير